Речиси две години подоцна, завршувањето на гасоводот во Северна Македонија се одложува. Проектот требаше да биде испорачан на крајот на следната година, но повторниот тендер од 84 милиони евра на Номагас покажува дека градежните работи конечно ќе бидат завршени за 36 месеци – односно до 2027 година, пишува грчки Иподомес.

Истовремено, има уште една промена која се однесува на капацитетот кој сега е наведен како 1,8 милијарди кубни метри годишно од 1,5 милијарди што беше првично.

Во исто време, на ТЕРНА и е доделен проектот за изградба на гасоводот за природен гас до Северна Македонија, додека тендерот за изградба на мерната станица за гасоводот е во тек од ДЕСФА. Буџетот на проектот е 15,8 милиони евра без ДДВ.

Според договорот потпишан на церемонија на 18 септември годинава за големиот проект „Детално проектирање, набавка на материјали и изградба на цевководот под висок притисок Неа Месимврија – Евзони/Гевгелија“ чиј изведувач е ТЕРНА, рокот за изградба е 18 месеци од потпишувањето на договорот.

Интерконекторот за природен гас Грција-Северна Македонија е вториот гасовод во Грција што ќе може да транспортира до 100% водород и ќе биде дел од водородната инфраструктура на земјата, придонесувајќи за енергетската транзиција и понатамошниот развој на пазарот на водород во Југоисточна и Централна Европа.

-Проектот „воден“ од ДЕСФА од грчка страна и Номагас од македонска страна, предвидува изградба на цевковод во вкупна должина од 125 километри кој ќе се протега од Неа Месимврија во Солун до Неготино преку Евзони/Гевгелија што ќе ги поврзува националниот природен систем за пренос на гас на Грција и Северна Македонија и отворање во соседната земја „порта“ за влез и за азербејџанскиот гас и за товарите на ЛНГ кои ќе влезат во Националниот систем за природен гас на Грција преку терминалите Ревитуса и Александрополи, пишува грчкиот портал.

Поконкретно, грчкиот дел, долг 57 километри, ќе започнува од областа Неа Месимврија во Солун и ќе завршува во областа Евзони/Гевгелија. Оттаму ќе започне делот од гасоводот на територијата на Северна Македонија, долг 68 километри, кој ќе завршува во областа на Неготино.

Што се однесува до карактеристиките на проектот, неговиот почетен капацитет ќе биде 1,8 милијарди кубни метри годишно, но со можност за проширување до 3 милијарди кубни метри годишно.

„Вреди да се напомене дека инвестицијата, која е означена како проект од заеднички интерес од страна на Енергетската заедница, значително ќе ја зајакне безбедноста на снабдувањето на Северна Македонија. Гасоводот ќе и овозможи на Северна Македонија дополнително да ги диверзифицира своите извори на снабдување и да создаде дополнителни енергетски коридори, поставувајќи ги темелите за понатамошна интеграција на пазарот на природен гас, како во регионот на Западен Балкан, така и во ЕУ, во исто време, проектот дополнително се зајакнува улогата на Грција како енергетска порта на Југоисточна Европа, преку транспорт на природен гас од грчкиот национален преносен систем за природен гас до Северна Македонија и од таму до остатокот од Европа“, нагласува грчкиот портал.

Македонскиот министер за транспорт и врски Александар Николоски пред неколку дена во Солун, а и вчера во интервју за ТВ 21 повтори дека гасниот интерконектор со Грција и брзата пруга се проекти приоритет број еден бидејќи Македонија може сериозно да се развива само од наплатата на транзит на гас и транспорт по брза пруга.

Тој потенцира дека тендерот за изградба на интерконекторот е распишан пред една недела, роковите се кратки и веќе во месец ноември треба да стигнат понудите.

-Можеме за две до три години да го изградиме тој интерконектор. Ќе имаме гасно поврзување од Александрополус преку Солун, Гевгелија, Скопје сè до Куманово, со што ќе ја намалиме зависноста од рускиот гас бидејќи сега гас стигнува само од Бугарија чиј сопственик е Гаспром. Нудиме и чекор понатаму. Со Србија потпишавме меморандум за разбирање за изградба на интерконектор со Србија. Ние сме стигнати до границата, а тие до Ниш и треба да се спуштат надолу. Тоа значи дека преку Македонија може да стигне најголем дел од гасот којшто ќе се користи во Централна Европа. И затоа треба да бидеме паменти, Македонија може да живее само од транзит на гас и транспорт преку железница – изјави министерот Николоски.

Николоски: Гасниот интерконектор може да го изградиме за две до три години