Министерството за здравство на Грција во соработка со Министерството за развој и Федерацијата на сопственици на бензински пумпи покрена кампања под мотото „Нема бензин, ако не носиш кацига“, насочена кон безбедноста во сообраќајот на возачите на мотори и заштита на човечките животи, пишуваат грчките медиуми.

Ова доаѓа по реакциите во јавноста и случајот со несреќата на Крит, во која загина 17-годишен мотоциклист, по што еден сопственик на бензинска пумпа на островот соопшти дека нема да точи гориво на моторџиите кои не носат кациги и ги повика сите колеги да го следат неговиот пример.

Грчкиот министер за здравство, Адонис Георгиадис, денеска се сретна со претставниците на Федерацијата на сопственици на бензински пумпи со цел владата да се вклучи во кампањата.