66-годишен жител на грчкиот остров Евија бил убиен од неговиот син, ќерката и зетот, кои потоа се обиделе да го прикријат злосторството со палење докази, јавува „Катимерини“. Сите тројца за време на испрашувањето во полиција го признале убиството.

Грозоморниот случај ја потресе Грција, откако се дознаа морничавите детали од злосторството.

Несреќниот човек бил задушен со перница, а тројцата млади луѓе потоа се обиделе да го прикријат злосторството – тие го соблекле убиениот, му ставиле нож во раката и телото го префрлиле под скали кои водат во подрумот на куќата.

Тогаш 22-годишниот син повикал полиција и пријавил дека таткото се обидел да го силува, додека другите двајца наводно ја запалиле перницата со која го извршиле делото. Приказната за силувањето не се поклопувала со доказите кои инспекторите ги нашле на местото на настанот, поради што веднаш почнале да се сомневаат во исказот на синот.

Полицијата се обидува да го утврди мотивот за бруталното злосторство, а првичните сомнежи се дека таткото бил убиен од користољубие, поточно поради 12.000 евра, кои биле пронајдени во куќата во која живеел, пишува „Катимерини“.