И претставниците на потрошувачите во Косово ќе се приклучат на иницијативата за бојкот на големите продавници поради високите цени.

Потенцираат дека итно мора да се преземат мерки, а граѓаните изразуваат загриженост за ниските плати и високите цени кои, според нив, осиромашиле многу семејства.

Високите цени станаа сериозен проблем за домаќинствата во Косово, велат граѓаните, кои својата загриженост ја оправдуваат со сè попразните корпи за храна и сегашните плати кои не ги покриваат нивните семејни трошоци.

Бараат институционални мерки за ублажување на ваквата состојба, предлагајќи да се покрене иницијатива за бојкот на продавниците во Косово, како што се случи во Хрватска, пишува РТК.

„Цените се високи. Ако ја споредиме денешната плата со платата од пред четири-пет години, куповната моќ е најмалку 50-60 отсто помала, а главните основни артикли што ги користиме во секојдневниот живот се зголемени за 100 отсто… На пример, бурек во пекарница пред три години беше 70 центи, а сега е 1 евро и 40 центи, што значи покачување за 100 отсто“, вели еден граѓанин.

„Доста тешко, ова е ненормален пораст, не знам кој е сега виновен. Треба да ги бојкотираме големите супермаркети како во Хрватска“, вели друг граѓанин. „Во Германија платите се 2.000-3.000 евра и цените се исти како кај нас. Па проценете сами“, вели граѓанинот, пренесува Коссев.

„Ќе ги поддржиме и потенцијалните бојкоти кај нас. Ако до 10 февруари немаме напредок меѓу партиите, меѓу компаниите, особено од Здружението на трговци, тогаш мора да дејствуваме затоа што треба да се браниме“, изјави Ељатин Качаник од организацијата „Потрошувач“.