Додека граѓаните се надеваат дека нема скоро да има минусни температури, продавачите на рачно плетени дебели чорапи, тријат раце, зачудени од добрата продажба. На пазарите има солидна понуда на овие производи, кои некогаш спаѓаа во категоријата сувенири, но годинава интересот е значително поголем од кога било. Зголемена е и продажбата на крзнени ќебиња и на дебели јоргани, а во продавниците за бела техника ни потврдија дека повторно се бараат шпоретите и камините на дрва.

Продавачите на зелените пазари велат дека калците се бараат и без оглед на нивната цена од 300 до 450 денари за чифт. Волнени чорапи почнаа дури да се продаваат и на интернет, но најчесто на пазарите, на мали импровизирани тезги.

-За разлика од претходните години, есенва има зголемена продажба. Цената некому му изгледа висока, но сепак, тоа се чорапи исплетени од волна. Изминативе децении ги продававме многу поретко и тоа најчесто на странци, како сувенири, или пак на нашинците што се во туѓина па сакаат да се потсетат на старите традиции. Годинава со високите цени на сите видови огрев, волнени калци бараат и оние што се греат на парно – велат на Бит-пазар.

Волнените чорапи одамна се историски и традиционални артефакти и со години беа исфрлени од мода.

-Порано беше незамисливо да немаш волнени чорапи, но сега повторно се покажа дека нема подобра инвестиција од нив. Живеам во стан, гледате што се случува со греењето, а допрва доаѓа зимскиот студ – вели една скопјанка, за која цената од 400 денари за чифт не беше проблем.

Освен овие производи, трговците се фалат и дека добро им оди и продажбата на крзнени ќебиња иако чинат и повеќе од 1.000 денари. Се бараат и подебели јоргани, како и волнените ќебиња.

Во продавниците за бела техника пак велат дека повторно има интерес за печките на дрва. Во „Гранекспорт“ дистрибутер на Алфа Плам, шпоретите на дрва се продаваат од 20.000 до 47.000, а камините од 15.000 до 44.000 денари.

-Интересот е зголемен, граѓаните бараат поевтин начин да се греат. Струјата е прескапа, а и има и недостиг од пелети. И тие што купија инвертори сега се враќаат на овој начин на греење. Замислете како им е на оние луѓе што живеат во планински населби или во градови што се на повисоко, каде што надворешните температури веќе влегоа во минус. Таму студот не може да се совлада со калорифер или со инвертор. Ако се користи квалитетно дрво и ако оџаците се прописно исчистени според сите стандарди, нема загадување – велат за „Слободен печат“ од „Гранекспорт“.

Некои граѓани, особено во населбите каде што нема централно греење, сега се каат што си ги дадоа печките на дрва.

-Сега повторно барам да купам шпорет на дрва, без разлика на цената, оти струјата е прескапа, а се појави и недостиг на пелети – вели жител на скопско Лисиче.

Сепак, и греење на дрва скапо ќе ги чини граѓаните, со оглед дека цената достигна и до 5.500 денар за кубен метар.