Граѓаните да не ги паркираат возилата под дрвја попладнево, апелираат од ЈП „Паркови и зеленило“ по најавата од УХМР дека се очекува нестабилно време со пороен дожд, грмежи, засилен ветер и услови за појава на невреме. На тој начин би се избегнале несакани последици, поточно би се избегнало врз автомобилот да падне дрво или гранка од дрво и да го оштети.

Колку за потсетување, доколку се предивика штета на автомобил од паднато дрво кое не било обележено за сечење, сопственикот на возилото нема да добие никаква отштета од Град Скопје и од јавното претпријатие, а сведоци сме дека при секој посилен ветар низ Скопје паѓаат дрвја и гранки.

Од „Паркови и зеленило“ апелираат до граѓаните доколку забележат паднато дрво да пријават во ЦУК на телефонот 112 или на дежурните телефони објавени на веб-страницата на претпријатието.