Владата донесе и официјална одлука да се дислоцира тетовската библиотека во помали простории од сегашните. Се работи за училници односно четири класа од факултетот за Музичка уметност сместени во Центарот за култура „Иљо Антески Смок“ Тетово, кои како што велат од библиотеката се со мала површина, ниски плафони, а ќе нема место ниту за вработените ниту за книгите. Одуката од Владата ја добиле минатата недела, а во неа пишува да ги напуштат просториите за 15 дена.

„Ние констатиравме дека тие простории не исполнуваат минимални услови за библиотека. И тука каде што сме, нема иделни услови за работа. Сега наместо да се прошириме, нас ни стигна наредба да одиме во уште полоши простории. Плус во тие простории ништо не е средено, таму има класови од Музичкиот факултет од ДУТ. Таму има 148 метри квадратни, но 13 квадрати се скали, плус има мала една просторија, таа не може да се користи воопшто. Плус има ниски плафони, нема циркулација на воздух, како ќе работиме. Нема тоалет, нема хигиеничарката каде да може да ги стави своите работи. Тука каде што сме сега имаме над 150 квадрати и плус високи се плафоните, но пак ни е претесно. Ако почнеме да се селиме тука ќе биде хаос, рафтовите нема да ги собере во новите простории, ќе ги оставиме читателите без книги. Ние не сме да одиме во други простории, туку да одиме во простории кои ќе ги исполнуваат условите“, вели Махи Муртезани библиотекар во Градската библиотека „Кочо Рацин“ Тетово.

Вработените од библиотеката, велат дека не можат да ја испочитуваат одлуката на Владата оти е нереална. Оттаму информираа дека ќе се обратат писмено до надлежното министерство да ја преиспитаат одлуката, а дотогаш ќе работаат во истите простории. Ако некој велат насила се обиде да не истера, нашите читатели ќе не бранат со жив штит и протести.

„Хипотетички и да одиме да се селиме и да започнеме книгите да ги носиме во другите простории таму нема да ги собере, со сигурност ова ви го тврдам, пола фонд на книги ќе останат на улица. Читателите се навикнати на ова место. Тие сега се во паника дека ќе се затвори библиотеката. Не знам која е логиката да се затвори библиотека која има над 90 000 книги, некои стари и над сто години, не само книгите, нема и рафтовите да ги собере.Планираме писмено пак да ги замолиме да не остават тука да работиме, нека пратат луѓе, да видат дека таму нема услови. Нема да се селиме додека не се најде решение“, вели Махи Муртезани од градската библиотека „Кочо Рацин“ Тетово.

Инаку просториите каде е сега сместена градската библиотека, ќе треба да се отстапи за делегацијата на Европската Унија.

Од бетер на побетер, тетовската библиотека ќе се сели во училници