Градоначалникот на Истанбул, Екрем Имамоглу, ги повика денеска турските граѓани од неговиот притвор да одржат масовни демонстрации низ земјата, бидејќи тој се наоѓа во затвор и го чека судењето.

Во објава на Х, Имамоглу рече дека правниот процес околу неговото притворање е „целосно незаконски и е предавство на Турција“, објави Ројтерс.

Турските обвинители побараа од судот да им одреди притвор на Имамоглу и четворица негови соработници во очекување на судењето за тероризам и корупција, што судот го прифати денеска, соопшти претходно канцеларијата на Имамоглу.

Имамоглу е клучна опозициска фигура и потенцијален противник на претседателските избори на турскиот претседател Реџеп Таип Ердоган, пренесува Танјуг.

Тој беше приведен во средата под обвинение за корупција и помагање на терористичка група, но тој ги негираше обвиненијата, нарекувајќи ги „незамислива клевета“.