Пакетчиња за најмладите, пакети со храна и средства за одржување на личната, но и на хигиената во домот, топла облека, ќебиња, по некој топол збор и ветување за изнаоѓање на проблемите кои ги мачат децата но и повозрасните. На овој начин дел од општините на територија на Град Скопје, на чело со градоначалниците кои ги водат, се обидуваат да „внесат“ празнична магија во домовите на семејствата од социјален ризик, но и на дечињата кои се згрижени во детските градинки и училиштата. Покрај тоа, за да се почувствува празничното расположение во деновите кои ни следат, на голем број локации во општините се организираат и бројни настани со културно-уметнички карактер , а дел од нив повторно имаат своја хумана мисија па средствата продадени од одредени ракотворби кои се изложени на бројните новогодишни базари ќе бидат донирани онаму каде што е најпотребно.

Еден таков настан кој има хуманитарен карактер беше организиран викендов во организација на Општина Аеродром. Предновогодишна хуманитарна забава „Најмладите за Аеродром“се одржа во саботата на платото пред Капитол мол. Покрај бројните естрадни уметници кои настапуваа пред публиката, на овој настан имаше и новогодишен базар, на кој посетителите имаа можност да купат новогодишни честитки и рачни изработки на децата од градинките и учениците од прво до петто одделение во основните училишта од општината.

Со средствата што се собрани од оваа акција, ќе бидат помогнати голем број семејства од социјално-ранливите категории во општината. Целта на овој настан е преку песна, другарување и забава да се сподели празничната еуфорија со жителите на општина Аеродром, а воедно да бидеме хумани во пресрет на најголемите празници во годината – објаснуваат од Општината.

Идентичен настан викендов се организирше и на територија на општина Кисела Вода. Во паркот „Шопен“ се одржа новогодишен хуманитарен базар, во организација на градоначалникот на Кисела Вода, здружението „Куќа на среќата“ и на Здружението на родители на деца заболени од церебрална парализа од Скопје. На настанот за децата со попречености се делеа новогодишни пакетчиња, обезбедени од градоначалникот Орце Ѓорѓиевски. На базарот се продаваа и изработки од децата од градинките од општина Кисела Вода, а средствата од продажбата ќе се наменат во хуманитарни цели, за потребите на лицата со попреченост.

Како дел од предпразничните активности, од Општина Кисела Вода обезбедени се пакетчиња за околу 1.300 деца од градинките, околу 200 за децата со посебни потреби и преку 500 пакетчиња за дечињата од социјално-загрозени семејства.

Новогодишните празнувања треба да бидат убави за сите, посебно за дечињата кои цел живот ги паметат подароците под елката, семејните празнувања и радоста на дарувањето. Се потрудив, како градоначалник, дечињата од сите градинки на територија на Кисела Вода и децата со посебни потреби да добијат новогодишно пакетче – изјави Ѓорѓиевски и додаде дека секое дете заслужува да биде среќно и да има убави спомени од детството.

И во Општина Карпош годинава се организира предновогодишен хепенинг.

Во тек е организирање на хуманитарна акција „Подај рака – донирај за својот сосед“ наменета за лица/семејства кои во моментот се во состојба на социјален ризик. За семејствата пак, кои што имаат малолетни деца се обезбедени и новогодишни пакетчиња – информираат од оваа скопска општина.

Од Општина Ѓорче Петров пак велат дека по повод новогодишните празници акцент ставиле на социјално загрозени семејства и лица на кои ќе им бидат поделени социјални пакети со храна и намирници.

За лицата со посебни потреби по барање на Центарот за помош на лица со ментален хендикеп „Порака“ обезбедивме ќебиња. Новогодишните празници најголема радост носат за децата. За учениците од прво одделение од сите шест основни училишта обезбедени се новогодишни пакетчиња.  Традиционално, во ООУ „Димитар Поп Георгиев Беровски“ во соработка со невладината организација „Адра“ организирана ќе биде акција за собирање храна и облека наменета за социјално загрозени лица и семејства. Годинава ќе биде донирана облека од ученици и вработени во училиштето, по што невладината организација ќе ги предаде онаму каде што е неопходно – информираат од Општина Ѓорче Петров.

Во рамките на бројните хуманитарни акции кои во овој период од годината се одбележуваат на територија на Општина Гази Баба пак, деновиве беа доделени хуманитарните пакети со храна и пакети со средства за хигиена, на  семејства во социјален ризик кои живеат на територија наа оваа скопска општина.

Во Општина Центар пак, исто така се доделуваат пакети со храна и пакетчиња на социјално загрозените семејства и на дел од дечињата кои живеат на територија на оваа скопска општина.