Градоначалникот на Гази Баба, Бобан Стефковски денеска, по повод девет години од катастрофалните поплави кои ги зафатија селата Стајковци, Сингелиќ, Инџиково, Ченто и другите делови од општината, изјави дека ќе започне иницијатива за поставување на спомен-плоча во чест на загинатите сограѓани, предвидена за следната 2026 година, кога ќе се навршат десет години од оваа огромна катастрофа.

„Денес, со длабоко чувство на тага, почит и солидарност, се сеќаваме на 6 август 2016 година – денот кој засекогаш го обележа нашето колективно сеќавање. Поминаа 9 години од големата трагедија која ги погоди Стајковци, Сингелиќ, Инџиково, Ченто и другите делови од нашата општина. Тоа беа моменти на страв, болка и загуба, кои засекогаш ги променија животите на многумина.

Следната година, 2026, ќе одбележиме 50 години од постоењето на нашата општина, но истовремено, тоа ќе биде и 10 години од трагичните поплави. Токму затоа, ќе започнам иницијатива за поставување на спомен-плоча, како симбол на сеќавање и почит“, вели Стефковски.

ФОТО | Девет години од страотните поплави во Стајковци во кои загинаа 22 лица

Тој додаде дека целта на оваа плоча е да биде вечно сеќавање не само на трагедијата, туку и на храброста, солидарноста и човечноста кои ги покажавме како народ во тие кризни моменти и ги повика сите граѓани, институции и организации да се вклучат и да ја поддржат оваа иницијатива.