Во населбата Стопански Двор во општина Ѓорче Петров денеска започна изградба на нова детска градинка во која ќе можат да се згрижат стотина деца. За нејзината изградба обезбедена е нова локација за објектот со површина од 415 метри квадратни на приземје и 483 метри квадратни на прв кат.

 Ветив пред граѓаните решавање на проблемот со недостиг на капацитети за упис на деца во градинките и токму тоа го остваруваме. Насочени сме кон целосна елиминација на списоците на деца кои чекаат за упси во детските градинки во Ѓорче Петров – изјави градоначалникот Александар Стојкоски.

Дечињата на возраст  до 2 години ќе бидат сместени во две групи на приземјето на градинката. Првиот кат е предвиден за поголемите дечиња кои дневните програми ќе ги поминуваат во 4 занимални, односно вкупно 6 занимални заедно со јаслите, поделени на два ката. Како што посочуваат од Општината, објектот ќе биде граден по најмодерни стандарди и ќе опфаќа и заедничка занимална, повеќенаменски простор, просторија за изолација и просторија за индивидуална работа, гардеробер, кујна, санитарни простории и отворена занимална.

Инвестиравме и во други нови капацитети за предучилишна возраст. Новоотворената градинка „Сонце“ во Волково е доказ дека работиме во насока на згрижување на сите дечиња по светски стандарди и на внимателно одбрани локации, предвидени за објеки за најмладите. Ја проширивме и градинката „Детелинка“ со две нови простории во кои згриживме 150 деца, рече Стојкоски.

Изградбата на новата детска градинка во Стопански Двор е инвестиција на Владата во вредност од 60 милиони денари. На поставувањето на камен-темелникот денеска присуствуваа и премиерот Христијан Мицкоски, како и неколку министри.