Поранешниот амбасадор во Софија, Марјан Ѓорчев, заедно со новинарот Зоран Иванов, во дебатната емисија „Само Вистина” на Канал 5 телевизија, дебатираа за потребните „црвени линии“ кои треба земјава да ги постави кон Република Бугарија. 

Ѓорчев истакна дека земјава веќе три децении избегнува да го реши проблемот со Р. Бугарија, а со тоа има создадено чувство кај сите бугарски политички чинители дека Македонија во даден момент ќе попушти на барањата на Бугарија.

– Три децении ние избегнувавме да го решиме проблемот со Република Бугарија, со непризнавањето на македонскиот јазик и идентитет. Кај сите политички чинители во Бугарија тоа создаде чувство дека ние во даден простор и време ќе попуштиме на нивните барања. Јас бев претставник на македонската Влада во Софија кога се вметна клаузулата да се потпишат сите 50 меѓународни договори, ние имавме застој од 1993 до 1999 година поради македонскиот јазик. Бугарија доби лажна надеж дека ние не сме обединети по тоа прашање и дека тие имаат декларација од бугарската академија на науките на која се повикуваат, рече Ѓорчев.

Тој додаде дека Бугарија во текот на изминатите децении се обидува да направи раздор помеѓу македонските политички партии.

– Имаме примери кога Каракачанов доаѓал во Македонија и се обидувал да направи раздор помеѓу политичките партии. Оваа декларација ќе ги зацврсти нашите поцизии како систем, во тој случај ќе бидеме на јасно, бидејќи до сега имавме ситуации кога одредени министри и премиери носеле самостојно решение без консултација со македонското Собрание. Ова значи дека Собранието на Р. Северна Македонија, МАНУ и УКИМ ќе имаат јасна позиција кон прашањето со Бугарија, што не значи ѕид. За првпат Северна Македонија изразува за што може и за што не може да преговара, додаде Ѓорчев.

Новинарот Иванов пак, вели дека секогаш постоело единство во земјава кога е во прашање проблемот со Бугарија .

– Ние сме забетонирани идентитетски, национално и јазично во Обединетите Нации. Европската Унија претставува клуб кој има свои правила, каде копа ровови и крева ѕидови. Ние таму не можеме да прескокнеме и сите веќе гледаме дека не е само Бугарија во прашање, туку има помоќни ментори, вели Иванов и додава дека нашата дипломатија нема изработено доволно кога е во прашање проблемот со Бугарија.

Новинарот исто така истакна дека од особена важност за Северна Македонија е да бидат отворени линиите со ЕУ, бидејќи земјава е дел од Европа.

– Нас ни треба ЕУ и во случај да не бидеме членка, ни требаат сите линии да бидат отворени, од финансиски до културолошки, бидејќи ние сме дел од Европа и мораме да комуницираме со развиената Европа, истакна Иванов.