Ѓоковиќ зборува опасни работи, мора да ги повлече своите зборови
Првиот светски тенисер се наоѓа во центарот на светската јавност поради своите ставови кои јавно ги изнесува за време на разговорите во живо на Инстаграм.
Новак Ѓоковиќ за време на пандемијата на коронавирусот редовно има разговори во живо на Инстаграм, на почетокот добиваше само пофални зборови од фановите и јавноста, но со последните неколку гости внесе забуна.
Препорачано
Претходно Ѓоковиќ изјави дека е противник на вакцинацијата против коронавирусот, но потоа изјави дека доколку таа е задолжителна за да продолжи со тенисот, без никакви проблеми ќе се вакцинира.
Но, најголема прашина се крена по последниот разговор во живо со иранскиот нутриционист Шервин Џафаријах.
„Гледав луѓе кои со енергетска трансформација, со помош на молитвите успеаја најотровната и најзагадената вода да ја претворат во здрава вода. Науката докажа дека молекулите во водата реагираат на нашите емоции“, изјави Ѓоковиќ.
Овие зборови предизвикаа лавина реакции,а меѓу најгласните беше поранешната тенисерка Мери Кариљо, која сега работи за Ен-Би-Си телевизијата.
– Знаеме дека Новак верува во медитација и молитвите. Тој не сакаше да оди на операција на лакотот и ја одложуваше бидејќи беше убеден дека може да го излечи своето тело на поинаков начин.
Но, тоа што го изјави за загадената вода ме вознемири. Ѓоковиќ и неговиот соговорник зборуваа дека отровната вода може да се трансформира во чиста преку молитви. Тоа се опасни зборови кои ги слушнале многу луѓе. Новак треба да ги повлече своите зборови – изјави Кариљо.
