Веќе 50 години најдобрите светски тенисери ја затвораат сезоната на АТП шампионатите, чие 51 издание започнува денеска во Лондон. Осум играчи кои ја обележаа годината ќе ги одмерат силите во главниот град на Англија 12 пат по ред, но и последен пред преселбата во Торино, Италија.

Во чест на првиот турнир, првата група од четворица тенисери се вика „Токио 1970“, а втората „Лондон 2020“.

Во групата која го носи името на главниот јапонски град е првиот светски рекет, се наоѓаат Србинот Новак Ѓоковиќ, потоа победникот, како и финалистот од Мастерсот во Париз, Русинот Данил Медведев и Германецот Александар Зверев, а тука е и дебитантот на завршните турнири, Аргентинецот Диего Шварцман.

Денеска од 15.00 часот први од групата „Лондон 2020“, ќе играат Доминик Тим и Стефанос Циципас, како реприза од минатогодишното финале во кое Гркот беше подобар од Австриецот, а од 21.00 часот Рафаел Надал (Шпанија) кој од девет обиди никогаш не го освоил Завршниот мастерс ќе игра против Андреј Рубљов (Русија).

В понеделник (15.00 часот) Ѓоковиќ за ривал го има Шварцман, а од 21.00 часот Медведев се соочува со Зверев.

Ноле до сега освои пет титули на АТП шампионатите и би можел да се израмни со рекордерот, Швајцарецот Рожер Федерер. Српскиот ас нема трофеј во Лондон од 2015 година, иако условите во сала и подлогата најмногу му одговараат. Последен пат играше во финалето пред две години кога загуби од Зверев.