Годишната стапка на инфлација во Грција во август изнесуваше 2,9 проценти, што е за 0,1 процент повеќе отколку во јули, покажуваат податоците на Грчкиот статистички институт (ЕЛСТАТ). Цените на производите и услугите од групите облека и обувки се зголемија за 7,7 проценти за една година, а услугите во групата Хотели-Кафулиња-Ресторани за 6,2 проценти, главно поради зголемувањето на цените во рестораните, слаткарниците, кафулињата и мензите.

Меѓу поединечните производи и услуги во Грција, најмногу пораснаа чоколадото (23,2 проценти), кафето (18,5 проценти), воздушниот транспорт (18,1 процент), овошјето (11,6 проценти) и кириите за станови (10,9 проценти). Храната и безалкохолните пијалаци поскапеа за 2,2 проценти за една година, главно поради зголемувањето на цените на леб, други пекарски и кондиторски производи, пица и пити, месо, свежа риба, млечни производи и јајца, овошје, замрзнат зеленчук, чоколадо и чоколадни производи, кондиторски производи, кафе.

Дел од тоа зголемување беше компензирано со пад на цените главно на тестенините, маслиновото масло, свежиот зеленчук, компирите, сосовите и зачините. Домувањето е за 3,7 проценти поскапо поради зголемувањето на цените, главно кирии за куќи, поправки и одржување на куќи, услуги поврзани со станот и електрична енергија. Од друга страна, цените на природниот гас, маслото за греење и цврстите горива за куќи и станови се намалија, информира Крстарица.