Јапонскиот производител на автомобили „Нисан“, кој се соочува со тешкотии, претрпе огромна годишна нето загуба во 2024-2025 година, оптоварена од болното реструктуирање кое ќе резултира со затворање на седум фабрики и намалување на 20.000 работни места, или 15 проценти од глобалната работна сила, до 2027 година.

„Реалноста е јасна. Имаме многу висока структура на трошоци. За да бидат работите уште покомплицирани, глобалниот пазар е нестабилен и непредвидлив, што го отежнува планирањето и инвестициите“, рече извршниот директор Иван Еспиноза.

„Нисан“, кој е 35 проценти во сопственост на француската компанија „Рено“, соопшти дека пријавил нето загуба од 671 милијарда јени за фискалната година. Тој слаб учинок може да се објасни со трошоците поврзани со преземениот план за закрепнување: поради големи долгови, губење на профитабилноста и забавување на продажбата на клучните пазари во САД и Кина.

Нисан објави во ноември дека сака да го намали производствениот капацитет за 20 проценти. Во исто време, има за цел да го намали бројот на работни места низ целиот свет, а денес беше објавено дека 20.000 работни места ќе бидат елиминирани до фискалната 2027 година.