Владата е стабилна, уверува премиерот Христијан Мицкоски, и покрај јавните препукувања помеѓу потпретседателот на Собранието Антонијо Милошоски од ВМРО-ДПМНЕ и министерот за правда Игор Филков од ЗНАМ. На ова им претходеа турбуленциите меѓу лидерите на Вреди за позиционирањето на локалните избори и намигнувањето на Арбен Таравари кон опозициската ДУИ.
Кавгата и навредите меѓу Милошоски и Филков за Мицкоски се само лош ден на двајцата што нема да се повтори.

– Владината коалиција е стабилна. Пратеникот Антонијо Милошоски е член на Извршниот комитет на партијата, тој е дел од мојот најблизок периметар. Јас соработката со Милошоски ја оценувам на највисоко ниво, тој е додадена вредност и во рамките на пратеничката група и во рамките на партијата. Министерот Игор Филков знам со какви проблеми се соочи, знам каква состојба затекна во Министерството за правда, континуирано, на дневна основа соработуваме во делот на реформите што се многу важни, особено во секторот правда. Но, она што можев да го заклучам, а убеден сум дека сето ова ќе застане на овие два лични ставови, е дека секој има право на лош ден, па така јас мислам дека тој лош ден и за едниот и за другиот завршува – рече Мицкоски.

Милошоски претходно, во телевизиско гостување констатираше дека Филков има слаби перформанси во областа со која раководи.

– Ова е мој личен став, не значи дека е став на партијата или пратеничката група. Јас сметам дека министерот за правда има слаби перформанси по однос на обврските што ги има преземено за реформите во правосудството. Тоа е мое мислење. Очекував досега барем во нацрт-верзија до Собранието да бидат доставени предлог-законите за судови, за судски буџет, за јавнообвинителската служба, новиот Кривичен законик… – рече Милошоски.

Филков не му остана должен и во реакцијата Милошоски го нарече „Кусурот на Груевски, познат под прекарот – Џуџето од Небрегово, и дека јавноста добро го памети по аферите поврзани со АМСМ и семејните бизниси од Кичево.

– Бидејќи очигледно е неинформиран и изолиран од партијата, го упатувам во неговата матична партија или во Владата – можеби конечно ќе го известат за постапките, роковите и статусот на законите. И, бидејќи изгледа како некој што работи по туѓи наредби, за кого одработува во моментов? Дали се тоа интересите на граѓаните или некои други агенди? Во минатото е познат по ванчомихајлистички ставови, многу лаги и невистини. Ова е лош дефокус на македонската јавност по двонеделниот „одмор“ – напиша, меѓу другото, Филков.

Дека Филков потфрлил во ресорот правда се согласи и лидерот на СДСМ Венко Филипче, кој одби да ги коментира несогласувањата во Вреди.

– Факт е дека Владата нема добар перформанс во спроведување на реформската агенда во делот на правосудството. Како претседател на Националниот совет за евроинтеграции направивме анализа во Собранието – 35 закони треба да се донесат до јуни 2025 година, и тоа повеќето од ресорот правда. Освен еден закон од дигитализацијата, кој е донесен, ниту еден не е во собраниска процедура. Реформската агенда е поврзана со 850 милиони евра наменети за нашата земја откако ќе се имплементираат. Ништо досега не е во процедура, а Владата го потпишала тој план во Брисел и се обврзала – рече Филипче.

По јавните обвинувања меѓу Таравари од една страна, и Изет Меџити, Билал Касами и Зекирија Ибрахими од друга, за тоа кој комуницира со ДУИ, но и за настапот на локалните избори, Мицкоски вели дека нема чувство дека има проблеми со Таравари.

– Не, немам такво чувство. Напротив, имаме исклучителна соработка. Граѓаните да бидат сигурни, Владата  е стабилна, повеќе од две третини неофицијално, а официјално 78 пратеници ја поддржуваат оваа Влада. Граѓаните, според она што го гледам од анкетите, даваат поддршка, огромно е позитивното мислење дека и Македонија се движи во позитивна насока и тоа претставува за нас инспирација да продолжиме понатаму, да се движиме и да работиме – рече Мицкоски.