Глобалниот долг достигна рекордни 337,7 трилиони долари на крајот од вториот квартал, поттикнат од олеснувањето на глобалните финансиски услови, послабиот американски долар и поблагите политики на водечките централни банки, според кварталниот извештај објавен денес и цитиран од Ројтерс.

Институтот за меѓународни финансии, здружение на индустријата за финансиски услуги, соопшти дека глобалниот долг се зголемил за повеќе од 21 трилион долари во првата половина од годината на 337,7 трилиони долари. Кина, Франција, САД, Германија, Обединетото Кралство и Јапонија забележаа најголемо зголемување на нивото на долг во долари, иако дел од растот се должи на слабеењето на доларот, откри институтот. Американската валута изгуби 9,75 проценти од својата вредност од почетокот на годината во однос на кошничка валути на главните трговски партнери.

Глобалниот долг расте со темпо споредливо со периодот на пандемијата „Обемот на ова зголемување е споредлив со порастот во втората половина на 2020 година, кога мерките против КОВИД доведоа до невидено зголемување на глобалниот долг“, соопшти Глобалниот монитор за долг на Институтот за меѓународни финансии.

Во однос на односот долг-БДП, што е мерка за способноста за сервисирање на долгот во однос на националното производство – најголемите зголемувања се забележани во Канада, Кина, Саудиска Арабија и Полска. Односот се намали во Ирска, Јапонија и Норвешка. Севкупно, односот на глобалниот долг-БДП продолжува полека да се намалува, останувајќи малку над 324 проценти. Сепак, на пазарите во развој, коефициентот достигна 242,4 проценти – нов рекорд, по намалената ревизија од мајскиот извештај. Вкупниот долг на пазарите во развој се зголеми за 3,4 трилиони долари во вториот квартал, достигнувајќи рекорд од повеќе од 109 трилиони долари. Емре Тифтак, директор на одделот за истражување на одржливоста на институтот, за време на вебинарот изјави дека зголемените воени трошоци ќе ги оптоварат владините буџети во услови на зголемени геополитички тензии. Тој истакна дека зголемувањето на долгот е концентрирано главно во владиниот сектор, особено во земјите од Г7 и Кина.