Поранешниот претседател на Црна Гора, Мило Ѓукановиќ, во Сараево оцени дека ситуацијата на Западен Балкан денес е полоша отколку што била пред десет години, а европската перспектива на тој регион ја опиша како „нејасна“. Тој особено предупреди на опасноста од „влијанието на големосрпскиот национализам“.

Ѓукановиќ беше гостин-предавач на Сараевскиот факултет за политички науки (ФПН), каде што им изјави на новинарите дека одговорноста за слабеењето на европските процеси и влијание во регионот е и на Европската унија и на земјите од Западен Балкан.

Во однос на ЕУ, тој рече дека му се чини дека нема доволно решителност за продолжување на процесот на обединување на европскиот континент, додека потенцијалните членки го носат својот дел од одговорноста бидејќи се бавни во спроведувањето на реформите што се бараат од нив. Сè е комплицирано поради влошувањето на геополитичките односи, вели Ѓукановиќ.