Кандидатот за градоначалник на Град Скопје од редовите на ВМРО-ДПМНЕ, Орце Ѓорѓиевски, денеска од Бутел најави низа капитални проекти за општината, меѓу кои изградба на кружен тек на крстосницата меѓу улиците „Бутелска“ и „Александар Урдаревски“, пробивање на нови улици и мега парк.

„Кружниот тек е дел од стратегијата за уредување на 50 критични крстосници низ Скопје, со цел зголемена безбедност и ред во сообраќајот. Сакаме град со нула фатални несреќи до 2030 година“, изјави Ѓорѓиевски.

Тој исто така вети целосна реконструкција на улиците „Бутелска“ и „Радишанска“, вклучувајќи нов асфалт, пешачки патеки, осветлување и атмосферска канализација како решение за поплавувањата.

„Планирано е и поврзување на „Бутелска“ со булеварот „Христијан Тодоровски Карпош“, со што ќе се намали метежот и ќе се подобри пристапот кон Бутел“, рече Ѓорѓиевски.

Останатиот дел од најавените проекти се реконструкција на Стар Качанички пат и развојот на Економската зона Визбегово, а на урбанистички план, нов модерен мега парк долж булеварот „Христијан Тодоровски Карпош“, со зелени површини, детски и спортски содржини, информираше тој.

Ѓорѓиевски најави и, како што вели,  ревитализација на реката Серава со уредени зелени коридори, велосипедски и пешачки патеки.