Неуспешен се покажа обидот на претседателот на ЗЕЛС и актуелен градоначалник на Општина Кисела Вода, Орце Ѓорѓиевски, на заедничка средба со градоначалниците на Струмица и на Карпош, Костадин Костадинов и Стевчо Јакимовски, да поразговара за проблемите со кои се соочуваат неговите двајца колеги и да ги убеди да се откажат од намерите за напуштање на ЗЕЛС.  Костадинов не дојде на денешната средба што ја организираше Ѓорѓиевски, а Јакимовски се приклучи подоцна.

Од Општина Струмица ни потврдија дека Костадинов не пристигнал во Скопје и дека неговиот став за напуштање на ЗЕЛС е конечен.

 Градоначалникот уште во петокот соопшти дека го напушта ЗЕЛС и дека не прифаќа средба затоа што таа нема ништо да промени – велат од Општината.

На средбата, која ја најави Ѓорѓиевски, требаше да се разговара со градоначалниците на Струмица и на Карпош, откако Костадинов соопшти дека го напушта ЗЕЛС поради индиферентниот однос околу проблемот со водата за пиење, а Јакимовски најави дека ќе ја напушти Заедницата доколку не престанат притисоците од неколкумина министри од актуелната Влада, за кои ЗЕЛС не реагира.

Во петокот, првиот човек на Општина Струмица преку Фејсбук информира дека нема да присуствува на следната седница во ЗЕЛС, што е уште една потврда на неговата одлука околу понатамошното членство во ЗЕЛС.

Во моментот за мене е неважно кој и што кажал од ЗЕЛС и од владините институции, многу поважни се следните приоритети што се, пред сè, во интерес на граѓаните на општина Струмица: 1. Седнување на маса на експерти од МЗШВ и АД „Водостопанство“ и да си го решат проблемот; 2. Институтот за јавно здравје јавно да ги објави резултатите од водата: 3. Решавање и расчистување на ситуацијата со унгарскиот кредит земен на грбот на граѓаните; 4. Консолидација и разгледување на можноста за повторно седнување на маса во ЗЕЛС. Не може пивка вода и пари за граѓаните да бидат помалку приоритетни од членството во ЗЕЛС – напиша Костадинов.

Одлуката на Костадинов да го напушти ЗЕЛС ја критикуваше и неговиот сопартиец, градоначалникот на Центар Горан Герасимовски, кој посочи дека верува дека работата на градоначалникот е отежната и дека можеби има и политички влијанија и притисоци, но дека одлуката за напуштање на ЗЕЛС е избрзана.

Проблемот со водата за пиење во Струмица е евидентен и сигурен сум за притисокот што се чувствува од граѓаните, но сметам дека пред да се донесе конечна одлука, претходно е неопходна координација, состанок и решавање на проблемите на маса -рече Герасимовски.

Но, Костадинов му одговори дека во време кога СДСМ се соочува со предизвици, од клучно значење е одржувањето на единството и колегијалноста и дека не се работи за
избрзана одлука, туку за решителност да ги заштити интересите на струмичани.

Се надевам дека и ти, со истата посветеност, ќе ги штитиш интересите на граѓаните на Општина Центар. Во овој момент, верувам дека е поважно да размислуваме за поддршка на одлуките, отколку да констатираме или толкуваме. Политички став или партиска кариера се градат исклучиво на постулатот на единството – му порача Костадинов на Герасимовски.

Костадинов: Тврдам дека водата во Струмица е исправна

Првиот човек на Карпош, на средбата се приклучи подоцна поради приватни обврски што не можел да ги одложи затоа што поканата за средба ја добил дури вчера наутро.

Јакимовски претходно соопшти дека ќе го напушти ЗЕЛС доколку претседателот на Заедницата Ѓорѓиевски немо ја следи целата ситуација и не преземе чекори за „вразумување на министрите“ бидејќи се врши, како што рече, континуиран притисок врз Карпош. Тој сметаше дека се потребни сериозни разговори со Ѓорѓиевски, иако не очекуваше дека нешто значајно ќе се промени. Сепак, по денешната средба Јакимовски реши дека останува во ЗЕЛС.

ЗЕЛС не е тој што предизвикува кризи, ЗЕЛС ги надминува кризите. Драго ми е што колегата Јакимовски останува во ЗЕЛС, а се надевам на скора средба и со Костадинов, како најгласен против заедницата. Факт е дека секогаш имало несогласувања помеѓу одреден градоначалник и министер, но логички е кога се работи да постојат и такви несогласувања. И затоа заеднички ќе ги надминеме. Ние сме тие кои влегуваме во директна медијација на процесот и верувам дека ќе ги надминеме какви и да се разликите и колку и длабоки да се истите – посочи Ѓорѓиевски по средбата, на која присуствуваа и потпретседателите на Зелс, градоначалникот на Чаир, Висар Ганиу и на Валандово, Перо Костадинов.

Според Ѓорѓиевски, во наредниот период ќе продолжи интензивна комуникација и со Струмица.

Колегата Перо Костадинов, кој е мој потпретседател и доаѓа од редовите на Социјалдемократскиот сојуз, ќе се потруди во тој дел како колега, како припадници на иста политичка партија со Костадин Костадинов да седнеме заеднички на маса и верувам дека, како и Стевче што кажа дека нема да излезе од ЗЕЛС и остава простор на процесот да ги надминеме проблемите, истото ќе се случи и со општина Струмица – рече претседателот на ЗЕЛС.

Во текот на наредните неколку денови, ЗЕЛС ќе направи обиди за организирање средби помеѓу двајцата градоначалници и претставниците на целтралната власт.