Кандидатот за градоначалник на Скопје од ВМРО-ДПМНЕ, Орце Ѓорѓиевски, денеска ја промовираше својата „Визија за Скопје 2025–2045“, која се темели на седум клучни столба.

Тој го повтори своето ветување дека во првите 72 часа ќе почнат активности за позитивни промени на главниот град.

– Ветив дека во првите 72 часа откако ќе го преземам местото градоначалник на Скопје ќе започнеме со активност каде ќе се вклучат сите општини. И за 72 часа, Скопје ќе блесне. Тоа е она што нѐ мачи изминатиот период и изминатите години. Скопјани заслужуваат чист град – рече Ѓорѓиевски.

Тој додаде дека е спремен да не се штеди и да се вложи до последниот атом.

Седумте столба на програмата

Ѓорѓиевски нагласи дека неговата програма опфаќа: одржлив урбан развој во следните 20 години, заштита на животната средина и биодиверзитетот, целосна комунална обнова, враќање на културниот идентитет на градот, дигитална трансформација и паметни решенија, Скопје како град на младите и науката и јакнење на јавната грижа и безбедноста.

Тој додаде дека модерните европски метрополи имаат долгорочни стратегии, наведувајќи го примерот на Виена со визија за 50 години однапред.

– И Скопје мора да размислува и да планира на исто ниво – рече Ѓорѓиевски, додавајќи дека ја гледа метрополата како зелен, поврзан и отворен град со јавни простори што им припаѓаат на граѓаните.