Српскиот тениски ас Новак Ѓоковиќ оваа сезона не изгледа како доминантниот шампион на кој сме навикнати, а можната причина за тоа ја објасни во интервју за американското издание „Деловен патник“.

„Поради операцијата што ја имав минатата година, како и здравствените проблеми на некои членови од моето најблиско семејство во последните пет-шест месеци, поголем дел од времето го поминав по болници, и дома и во странство “, изјави Ѓоковиќ, признавајќи дека тоа влијаело на неговата подготовка и форма.

Можеби токму тоа е и причината што го натера да го прескокне претстојниот Мастерс во Рим, иако официјално сè уште не открил зошто нема да настапи на Италијанскиот опен. Посетите на болници кај него поттикнале и едно ново размислување:

„Бев љубопитен што јадат и пијат докторите. Како се однесуваат кон сопственото здравје? Искрено, бев разочаран бидејќи многумина од нив консумираат брза храна и пијалаци со многу хемикалии“, раскажа Ѓоковиќ.

Ова не го спомна во контекст на резултатската криза, туку како дел од неговиот нов проект, брендот на суплементи „Сила“, кој е веќе достапен во Европа и САД.

„Работиме на клучните аспекти за постигнување добри резултати и долготрајност, вклучувајќи сон, фокус, здравје и развој на мускулатурата. Ова не е само за спортисти. Секој сака да го даде својот максимум, било дома или на работа“, вели Новак.

Според него, лошата исхрана и недоволна хидрација може да доведат до пад на енергијата и хроничен замор, што е особено тешко за оние кои се трудат да го балансираат работниот и семејниот живот.

„Една од моите најголеми желби е да видам повеќе здрави, а помалку болни луѓе. Тоа не се постигнува преку ноќ. Сакам да се фокусирам на превенција и враќање кон природата. Мора да најдеме начин да ја балансираме конвенционалната медицина со алтернативната “ додава Ѓоковиќ.

Како што полека се ближи крајот на неговата играчка кариера, тенисот веќе не е во фокусот на Новак. Она на што сега најмногу сака да се посвети е семејството.

„Родителството е мојата најголема страст. Сакам да им го надоместам времето на моите деца. Прекрасно е да бидам дел од нивното секојдневие, тоа го исполнува моето срце“, заврши Ѓоковиќ.

🎾 Cover Reveal – Novak Djokovic 🎾

Tennis legend @DjokerNole has conquered the sport, solidifying himself as one of the greatest athletes of all time. He shares exclusively with Business Traveler USA his moves off the court.https://t.co/mLXD3YfbSp pic.twitter.com/mgBgnzqPH1

— Business Traveler (@BizTraveler_USA) May 1, 2025