Српскиот ас и еден од најдобрите тенисери во историјата, Новак Ѓоковиќ, испиша нова страница во својата блескава кариера, освојувајќи го својот 100. трофеј. Тој во финалето на турнирот во Женева, по голема битка, го совлада Полјакот Хуберт Хуркач со 2:1 во сетови (5-7, 7-6, 7-6).

Иако имаше две брејк-шанси во петтиот гем од првиот сет, Ѓоковиќ не успеа да ги реализира, а Хуркач го казни тоа и во финишот го доби сетот со 7-5.

Вториот сет донесе вистинска тениска класика, ниту еден од тенисерите не го загуби својот сервис, па победникот мораше да се решава во тај-брејк. Таму, Ѓоковиќ ја демонстрираше својата ментална цврстина и со убедливи 7-2 израмни на 1-1.

Во решавачкиот сет, Хуркач одлично стартуваше и веднаш направи брејк, но Ѓоковиќ не се предаде. Во осмиот гем возврати со брејк и израмни на 4-4, по што следуваше уште еден тај-брејк.

И повторно, кога беше најважно, Ѓоковиќ беше најдобар. Со нови 7-2, го доби мечот и го прослави својот 100. АТП трофеј.