До крајот на 2026 година ќе бидат обновени 80 отсто од хидроцентралите и ќе добиеме дополнителни години безбедност на нашиот електроенергетски систем, изјави генералниот директор на Електростопанството на Србија (ЕПС), Душан Живковиќ.

На конференцијата „Обновливи извори на енергија (ОИЕ) Србија 2024“, тој рече дека во следните неколку години, преку стратешко партнерство, Електропривреда во своето портфолио ќе има еден гигават самобалансирани соларни електрани, со 200 најавени мегавати батериски систем за складирање на електрична енергија. Живковиќ додаде дека, со сите постоечки проекти, 2030 година ја гледа како година во која ЕПС во значителна мера ќе се декарбонизира, ќе го зголеми учеството на ОИЕ и ќе ги достигне зацртаните цели. Тој посочи дека освен изградбата на првата фарма на ветер „Костолац“ и соларната централа „Петка“, локации за нови се главно депонии за пепел од домашни термоелектрани.

Српската министерка за рударство и енергетика Дубравка Ѓедовиќ Хандановиќ денеска изјави дека се очекува Србија до 2026 година да има повеќе од 1.500 зелени мегавати, што е 33 пати повеќе од 2012 година и два и пол пати повеќе од пред две години. Министерката рече дека во август на мрежата имало околу 390 електрани од ОИЕ со вкупна моќност од 753 мегавати, а во тек е изградбата на уште 750 мегавати нови електрани со користење на овие извори, соопштија од нејзиниот кабинет.