Уставниот суд на Германија го потврди специјалниот данок на пакувањето храна и пијалоци за еднократна употреба што го наплаќа германскиот универзитетски град Тибинген. Со ова судот ја отфрли и тужбата на локалната франшиза на синџирот за брза храна Мекдоналдс, чиј сопственик е убеден дека данокот ја нарушува слободата на деловното работење.

Сопственикот на локалната франшиза на американскиот прехранбен гигант поднесе тужба, верувајќи дека данокот, кој се однесува на широк спектар на пакувања за еднократна употреба на сè, од хартиени чаши за еднократна употреба до прибор за јадење и сламки – ја нарушува слободата на деловното работење предвидена во германскиот устав.

Уставниот суд во Карлсруе пресуди дека данокот всушност ја попречува слободата на деловното работење, но на оправдан и уставно усогласен начин. Тибинген, кој се наоѓа во југозападниот дел на Германија, го усвои данокот на почетокот на 2022 година со цел да се намали количината на отпад на јавните простори. Данокот за пакување како чаши и тацни за еднократна употреба е 0,50 евра по производ, а за прибор за јадење и предмети за еднократна употреба како сламки 0,20 евра по производ, информира Н1 Словенија.