Денешните пензионери и оние на крајот од својот работен век придонеле за проблемите на економијата и одбраната и сега би можеле да отплатат дел од својот долг со една година задолжителна воена служба, изјави Марсел Фрачер, претседател на Институтот за економски истражувања (ДИВ), објави германската ДПА.

„Некои од пензионерите нема да можат да го прават ова од здравствени причини, но прописите предвидуваат и такви исклучоци кај помладата генерација“, изјави Фрачер за списанието „Шпигел“. „Постарата генерација треба да придонесе повеќе, на пример во областите на социјална помош и одбрана – зошто да не ги користиме луѓето, особено оние што беа во Бундесверот? Ни треба поголема солидарност меѓу постарите и младите“, додаде Фрачер.

Кога го прашале за што конкретно ја обвинува постарата генерација, тој ги навел „незнаењето, егоцентризмот и наивноста“. Според него, „одбивавме предолго да ја гледаме ситуацијата“.

„Значи, на крајот од Студената војна, верувавме дека никогаш повеќе нема да мора да се браниме и да ги трошиме дивидендите од мирно време“, рече тој. „Затоа сега мора да зборуваме за инвестирање на повеќе од пет проценти од БДП во одбрана, бидејќи мора да ја надоместиме штетата направена во последните 35 години. Можеме да ја разгледаме и климатската политика, бидејќи со децении знаеме дека седиме на темпирана бомба“.

Бејби-бумерите, кои сега полека се пензионираат, се најголемата генерација. Во исто време, тие самите одлучија да имаат малку деца, истакна Фрачер. „Во 1960-тите, еден пензионер беше издржуван од шест работници. Наскоро односот ќе биде еден спрема два“, продолжи економистот. „Зошто само младите луѓе треба да ја плаќаат цената за животните одлуки на бејби-бумерите, кои избегнуваат секаква одговорност во последните 20 години?“ Товарот врз помладите генерации мора да остане поднослив, додаде тој, пренесува Феникс магазин.