Германија и Турција се судрија околу традиционалниот специјалитет донер ќебап, а Берлин се жали на обидот на Турција популарната улична храна да добие заштитен статус во ЕУ, како што е шпанската серано шунка или неаполската пица.

Спорот околу специјалитетот започна во април кога Турција поднесе барање за регистрирање на името „донер“ како „загарантиран традиционален специјалитет“ низ Европа, што значи дека етикетата може да ја користат само производителите кои следат одредени методи на производство и спецификации за месото, од кој се прави ќебапот, пренесува АП.

Германија тврди дека тоа ќе создаде огромни бирократски пречки и ќе ја зголеми цената на популарното јадење. Со оглед на тоа што прашањето за трошоците за живот ги загрижува гласачите пред клучните регионални избори во Германија во септември, официјален Берлин стави вето на барањето на Турција, пишува Политика.