Градоначалникот на Општина Центар, Горан Герасимовски, утринава се вклучи во живо и информираше дека општинските хигиеничари се излезени на терен и го собираат отпадот од центарските улици, обврска која, како што вели, им припаѓа на Градот и на „Комунална хигиена-Скопје“.

„Еве вака „Комунална хигиена“ си ја извршува својата работа. Како и изминативе неколку години, така и ова понеделничко утро центарци се будат со ѓубре, целата општина е со смет. Нашите 120 хигиеничари се постојано на терен и ја завршуваат работата и обврската за која центарци плаќаат на ЈП „Комунална Хигиена-Скопје“. Верувам дека после волку многу апели, тие ќе се свестат и повеќе нема да го имаме овој смет по улиците во Центар“, рече Герасимовски.

Тој упати апел до комуналното претпријатие да започне со редовно собирање на отпадот.