Кандидатот за градоначалник и актуелен прв човек на Општина Центар, Горан Герасимовски, пред пензионерите најави изградба на современ дом за стари лица, по повод одбележувањето на Меѓународниот ден на стари лица.

Новиот дом ќе биде со субвенционирана цена од 200 евра во денарска противвредност.

„Ова беше едно од најчестите барања на пензионерите. Сите сме свесни колку е скапо и тешко сместувањето во приватни домови, па затоа решивме да преземеме конкретен чекор што ќе обезбеди достоинствено стареење за нашите постари сограѓани“, изјави Герасимовски.

Планираниот дом ќе може да смести 50 лица и ќе ги исполнува европските стандарди за квалитет и грижа.

Корисниците ќе имаат пристап до 24-часовна медицинска нега, разновидна и урамнотежена исхрана, како и до програми со социјални активности што ќе овозможат активно и исполнето секојдневие.

„На тој начин, пензионерите нема само да бидат згрижени, туку ќе имаат можност за вистински достоинствен живот во својата трета доба,“ додаде Герасимовски.