Кандидатот за градоначалник од редовите на СДСМ и актуелен градоначалник на Општина Центар Горан Герасимовски, заедно со носителот на советничката листа Александар Савевски и сите кандидати за советници, ја започнаа кампањата за локалните избори со садење дрвја во Паркот на Франкофонијата.

„Денеска кампањата за локални избори ја почнавме со работа – со садење дрвја во Паркот на Франкофонија како за развој, одржливост и долгорочна грижа за Центар и за идните генерации. Во изминатите четири години со доверба од граѓаните создадовме нова приказна во Центар. Со многу работа, со многу љубов, знаење и верба, го развивавме Центар што го сакаме.

Заедно со центарци, повторно испишавме одлична програма за сите маала, улици и граѓани. Со нашиот центарски и најголем тим од 600тини волонтери и поддржувачи ќе влеземе во над 15 илјади домаќинства. Лично и со мојот одличен тим, сакаме да ви ги понудиме најдобрите решенија за сите барања и потреби“ напиша Герасимовски на Фејсбук.

Тој ветува мирна и позитивна кампања, а на останатите кандидати им посака среќа и желба да бидат дел од како што вели новата центарска култура која ја креирале.

„Преку позитивна кампања да се натпреваруваме со идеи и проекти. Во Центар немало и не смее да има место за навреди и омаловажувања. Верувам дека граѓаните повторно ќе го изберат Центар што го сакаме!“ порача Герасимовски.