Фирми со узурпирање на охридските плажи оствариле нелегален приход од 190 милиони денари. Општина Охрид ќе продолжи со отстранување на бесправните градби и ќе ги ослободи плажите за туристите, посетителите и граѓаните на кои претходно им се наплаќало паркинг, влез и лежалки, информираше на својот фејсбук профил градоначалникот на Охрид, Константин Георгиески. 

Општина Охрид останува посветена на исполнување на препораките од УНЕСКО и продолжува со отстранување на бесправните градби кои го узурпираат охридското крајбрежје.
Во рамки на своите можности и помошта од „Македонија Пат“ Општина Охрид ќе ги ослободи плажите за туристите, посетителите, граѓаните на кои претходно им се наплаќаше паркинг, влез и лежалки.
Финансиските извештаи кои ги направи Општина Охрид покажаа фрапантни податоци на остварен нелегален приход во висина од дури 190 милиони денари за четири години.
Оваа пракса на градење бизниси на сметка на општината мора да се запре. Токму затоа во наредниот период започнуваме со интензивни активности за чистење на бреговите „Елешец“, Студенчишта“ кон „Горица 1“ и плажите во делот на населбата на „Канео“, кои се опфатени во Генералниот урбанистички план.
Општина Охрид повторно апелира дека во овој процес никој нема да биде поштеден.
Воедно ги поканувам еколошките здруженија кои будно ги следат состојбите во Охрид да се вклучат во целиот процес и да помогнат околу уредувањето на плажите.