Генералот Марк Мили, командант на Здружениот генералштаб на САД, изјави дека Русија, како и Украина, најверојатно нема да ги постигне своите воени цели.

Во интервју за „Фајненшл тајмс“, Мили рече дека Пентагон ги ревидира своите резерви на оружје и можеби ќе треба да ги зголеми воените трошоци со оглед на тоа колку брзо муницијата се троши во војната во Украина. Иако тој не ги поврза забрзаните трошења за муниција со неговата поддршка за мировните разговори, тој рече дека верува оти војната ќе заврши на преговарачката маса.

„За Русите ќе биде речиси невозможно воено да ги постигнат своите политички цели. Многу е неверојатно Русија да ја освои Украина. Тоа едноставно нема да се случи“, рече Мили.

Но, веднаш потоа тој додаде дека ќе биде „многу, многу тешко за Украина да ја постигне целта да ги протера Русите од секој сантиметар од територијата окупирана од Русија“. „Тоа не значи дека нема да се случи, но тоа е исклучително тешка задача. Тоа во принцип би барало целосен колапс на руската војска“, тврди Мили.