Популарниот шпански стример Дејвид Кановас, познат како ДГрефг (TheGrefg), е вмешан во правна битка во Андора со 80-годишна жена што се обидува да ја избрка од неговата куќа.

Кановас (26) собра богатство од неговите видеа на Јутуб и стримовите на Твич, каде што има заедничка публика од повеќе од 29 милиони следбеници кои го следат додека игра видео игри, го прикажува својот животен стил и коментира фудбалски натпревари.

Во летото 2020 година, Кановас купил станбен блок во андорското село Ескалдес-Енгордани преку неговата компанија за недвижнини Грефито СЛУ, пишува Еуроњуз.

Кога претходниот сопственик го продал имотот, побарал од соседите да си заминат, а компанијата на Кановас исто така престанала да ги обновува договорите на станарите.

Сите на крајот си заминале, освен еден станар, 80-годишна жена која живела во истиот стан речиси 36 години.

Живеејќи во имотот од 1989 година, договорот за закуп на жената бил вербален и на неопределен период, што му претходело на сегашниот Закон за закуп во земјата од 1993 година, кој и дава право на доживотен закуп.

Додека компанијата можеше да престане да ги обновува годишните договори на другите станари, не може да го стори истото за бабичката, која се нема намера да се откаже од својот дом.

Спорот меѓу двете страни станал толку тензичен што компанијата Грефито за да не ја загуби финансиската инвестиција решила да започне со реновирање заедно со старицата која се уште живее во куќата.

„Станот е целосно непогоден за живеење. Многу од прозорците и ролетните се искинати, а зимата во Андора е многу студена“, изјави Пере Кристофол, адвокатот на жената за Еуроњуз.

Првите чекори во реновирањето на објектот го оставиле многу студен бидејќи немало како да се изолира од студениот воздух, а поради замрзнати цевки не течело вода.

Адвокатот вели дека на крајот на 2022 година успеале да го натераат судот да ѝ наложи на компанијата да ги замени прозорците, а компанијата на Кановас поднела жалба и до денес тие се уште чекаат на одлука.

Неколку месеци подоцна, во април 2023 година, компанијата отвори нов фронт во судовите и поднесе барање за иселување на постарата жена. Судијата го прифати барањето, иако жената и нејзиниот адвокат поднесоа жалба на одлуката.

„Судењето се одржа на 11 јули, а на 18 август беше изречена пресудата. Никогаш не сум видел случај да помине толку брзо во целата моја кариера. Тие сакале судството да постапува со иста брзина кога апликациите ги поднесува мојот клиент како кога ги поднесува спротивната страна. Тие не постапуваат со иста ажурност“, вели Кристофол.

По веста за правната битка меѓу постарата жена и стримерот, а соочени со критиките на социјалните мрежи, Кановас доцна во понеделникот објави изјава во која ја обвини жената за „навредлива окупација“.

Компанијата тврди дека постарата жена не плаќала кирија со месеци, но нејзиниот адвокат жестоко го негира тоа.

„Таа продолжува да ја плаќа киријата секој месец, во спротивно немаше да може да се жали на судската одлука. Работата е во тоа што компанијата не сака да ги добие парите од јануари 2021 година“, вели адвокатот, кој посочува дека ова може да биде форма на притисок од сопствениците. Затоа неговиот клиент секој месец ја плаќа киријата на судот.

Во истата изјава, Кановас уверува дека тој лично не управува со компанијата, што значи дека немал никакво знаење за третманот што таа го добила. Тој исто така тврди дека жената „насилно“ зафаќа два стана и не живее во имотот.

„Не е дека таа не живее во станот, туку само дека во многу студени денови не може да спие таму. Тоа е како некој да ги тргне тркалата од вашиот автомобил и да ве праша зошто не го користите. Како може таа да спие таму во тие услови?” вели адвокатот.

Што се однесува до „насилното однесување“, Кристофол објаснува дека двата стана биле споени кога неговиот клиент првпат се вселил во зградата.

Сепак, многу од обожавателите на популарниот стример оставаат коментари за случајот под неговите видеа. „Грефг ти си тој што ѝ го отежнува животот на оваа баба со години“, пишува во еден коментар, додека друг рече „остави ја бабата на мир!“