Калифа Гедбан (26), познато име во македонската ракометна јавност, кој успеа со РК Вардар да ја освои Лигата на шампионите во 2019 година, сега повторно е во нашата земја, но во друг клуб, во боите на РК Еурофарм Пелистер.

Алжирскиот репрезентативен голман веќе има големо искуство на интернационалната сцена, неговите желби со битолската екипа се одбрана на титулата во домашниот шампионат, а и важно ќе биде учеството во ЛШ.

– Многу сум среќен што се вратив во Македонија, овојпат во друг клуб – во Еурофарм Пелистер. Навистина сум среќен. Мислам дека имаме добар тим, мора да се бориме за домашната титула, а ќе играме и во Лигата на шампионите. Нема да биде лесна сезона, но мора да се бориме за секој натпревар.

Битола е убав град, веќе ја познавам. Го посетив градот 3-4 пати претходно, а сега ќе живеам тука. Ми се допаѓа градот, луѓето исто така и не се чувствувам како странец, туку како да сум дома. Лигата на шампионите е најважното натпреварување во светот на ракометот. За Еурофарм Пелистер многу е важно што ќе учествува оваа сезона. Ќе биде интересен и голем предизвик за сите нас – вели Гедбан.

По двата тест-мечеви против Еурофарм Пелистер 2, играчите на тренерот Александар Јовиќ од средината на август ќе имаат турнирски натпревари:

Добој (14-18 август)
Група А: Еурофарм Пелистер (Македонија), Слога Добој (БиХ), Монпелје (Франција), Ал-Ахли (Египет)
Група Б: Барселона (Шпанија), Загреб (Хрватска), Целје Пивоварна Лашко (Словенија), Војводина (Србија)

Охрид (23-26 август)
Група А: ГРК Охрид (Македонија), Бешикташ (Турција), Голден Арт (Македонија), Олимпијакос (Грција)
Група Б: Еурофарм Пелистер (Македонија), Металопластика Шабац (Србија), Татран Прешов (Словачка), Бутел Скопје (Скопје)

Официјални натпревари:
Суперкуп на Македонија: Еурофарм Пелистер – Вардар 1961 (не е дефиниран термин)
Суперлига – прво коло: Вардар 1961 – Еурофарм Пелистер (9/10 септември)
Лига на шампиони – прво коло: Еурофарм Пелистер – Колштад (13/14 септември)