Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: велигденски путер колачи.

– Секој Велигден носи со себе особено уживање во слатките моменти на празничните денови. Велигденските празници се вистинска можност да се собереме со најблиските, да ги разменуваме насмевките и љубовта, а не треба да ги заборавиме и прекрасните вкусови. Велигденските путер колачиња се вистински фаворити, меки и вкусни, кои ќе ги пленат сите присутни – порачува Бобе.

Потребни состојки:

– 440 грама брашно
– 220 грама путер
– 220 грама шеќер
– 1 ќесичка ванилин шеќер
– јајце
– половина лажица прашок за печиво
– 1 лажица цимет
– 2 лажици какао

Начин на подготовка:

Во сад за матење се ставаат и матат путерот, шеќерот и ванилата, а потоа се додава и јајцето. Кога смесата ќе се соедини, се додава претходно измешаното брашно со прашокот за печиво и цимет.

Тестото убаво рачно се замесува, се дели на два дела, едниот дел се остава бел, а во другиот дел се додава какаото и се меси да стане еднаква бојата во целото тесто. Секој дел се обвиткува со растеглива фолија и се става во фрижидер на 30 минути – за да се излади тестото.

Се зема едниот дел од тестото и на површина посипана со брашно се развлекува кора со дебелина од 5 мм. Потоа со модла се сечат различни форми. Се редат на плех со хартија за печење и се ставаат во загреана рерна на 180 степени Целзиусови да се печат 10 минути. Истата постапка се повторува и со другиот дел од тестото.

Велигденските путер колачиња не се само вкусни, туку и совршени за споделување со најблиските. Меки, ронливи и ароматични, овие колачи ќе станат неизоставен дел од вашите празнични традиции, совршени за секој момент на заедништво и радост.

На здравје сладење!