Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за едно од омилените печива – варен ѓеврек.

– Овие варени ѓевречиња се со прекрасен сладок вкус од медот во кои се вареа, а се многу добра комбинација со печениот сусам во кои се обвиткани. Внатре се меки како памук – порачува Бобе.

Состојки:

– 1 кг брашно
– 100 мл масло
– свеж квасец
– 500 мл млако млеко
– 3 мали лажици сол
– мала лажица шеќер
– 2 големи лажици мед
– 250 г сусам

Подготовка:

Се замесува меко тесто (да не лепи на рацете) од брашното, квасецот, маслото, сол, шеќер и млекото, а ако има потреба, се достава вода. Се остава 40 минути покриено со крпа, да стаса тестото. Стасано тестото се дели на 15/20 топчиња, според тоа колкава големина сакате да бидат.

Од секое топче се прави долго црево чии краеви се спојуваат и се формира ѓеврек. Оформените ѓевреци се редат на набрашнета површина, се покриваат со памучна крпа и се оставаат 15 минути, за да стасаат.
Во длабок сад се става 1 л вода и 2 лажици мед да зоврие. Откако ќе зоврие водата, во неа се става ѓеврек (долната страна што стоел на масата да биде горе) и се вари 30 секунди.

Потоа со цедалка се вади исцеден и директно се става во сусам, се врти во сусамот и од другата страна, па се реди во тепсија врз хартија за печење. Се печат 15 минути, во загреана рерна на 200 степени.

На здравје!