Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: туфахии – полнети јаболка.

– Откријте ја магијата на полнети јаболка – туфахии! Замислете сочни, варени јаболка, полнети со мешавина од карамелизирани ореви и зачинети со освежувачки шмек од каранфилче – порачува Бобе.

Потребни состојки:

– 6 јаболка, излупени, извадени средината и семките
– 7-8 каранфилчиња
– 150 грама мелени ореви
– 1 голема лажица путер
– 150 мл млеко
– 700 грама шеќер/кафеав шеќер

Подготовка:

Првин се подготвува филот. Ставаме 300 грама шеќер во тенџере, на средна температура за да се карамелизира. На карамелот му додаваме една голема лажица путер и 150 мл топло млеко. Потоа, ги додаваме мелените ореви да повријат 5 минути, го тргаме филот од оган и го оставаме да се излади.

Во длабок сад подготвуваме шербет: 400 грама шеќер, 800 мл вода и каранфилчињата да зовријат. Во шербетот се варат излупените и исчистени од семки (издлабена средината) јаболката – прво 6-7 минути да вријат од едната, па потоа од другата страна уште 6-7 минути. Ги вадиме со цедалка и ги оставаме да се изладат. Во средината јаболката ги полниме со изладениот фил, а најгоре ги декорираме по желба со мелени ореви, шлаг. Јас ги декорирав со матен шам од белки и шеќер.

Се чуваат во фрижидер. На здравје сладење!