Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за сушени домати.

– Најдобри за сушење се малите меснати домати, зрели, црвени, сè уште цврсти и без дамки. Пелатите се токму такви – меснати и цврсти, но секако можат да се сушат и други сорти, како, на пример, чери доматите – вели Бобе.

Состојки:

– 5 кг пелати домати
– 5 мали лажички морска сол
– лажичка шеќер
– парчиња ситно сечкан лук
– гранче рузмарин
– екстра девствено маслиново масло.

Мерките се произволни, со визуелна процена – според вкусовите можат да се додадат повеќе зачини, а доколку нема свежи, можат да се користат и сушени зачински билки.

Подготовка:

Измиените и просушени домати се сечат на четвртини, по должина, и се оставаат на решетка најмалку половина час за да се исцедат. Колку повеќе ќе се исцедат, толку покусо ќе трае сушењето.
Тавата за печење се обложува со хартија за печење, на која се ставаат доматите, посолени. Внимавајте да не се допираат, за воздухот слободно да циркулира.

Сушете во рерна загреана на 120 степени (вентилатор 90-100 степени), додека рабовите на пелатите не се свиткаат, а тие не се намалат на една третина од претходната големина. Времето на сушењето е од два до три часа, во зависност од тоа колку биле сочни. Повремено се препорачува отворање на рерната (за да излезат влагата и чадот).

Во стерилизирани тегли ставете ги целите резанки од лукот, гранчето рузмарин и наполнете со сушените домати. Врз доматите ставете малку шеќер (солта не е потребна, солени се претходно) и на крајот сипете маслиново масло. Маслото треба да ги покрие сушените домати. Затворете ги теглите, а за да стојат надвор од фрижидерот, теглите со сушените домати треба да се стават во рерна и да се греат половина час на температура од 100 степени. Потоа рерната се исклучува и сушените домати се оставаат во неа да се изладат.

На здравје!