Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: шненокли.

– Ако сакате да се засладите со неодоливо нежни и кремасти десерти, тогаш шненоклите се идеален избор! Овој класичен и лесен рецепт ќе ви понуди вистинско задоволство за непцето, а подготовката е едноставна и брза – порачува Бобе.

Состојки:

– 500 мл млеко

– 2 јајца

– 4 лажици шеќер

– 1 ванилин шеќер

– 1 лажици бело брашно

Подготовка:

1. Во 500 мл млеко додајте ванилин шеќер и 2 лажици шеќер, па оставете да проврие.

2. Изматете 2 белки со прстофат сол додека не добиете цврст снег.

3. Кога млекото ќе почне да врие, користете лажица да формирате мали делчиња од белката и внимателно ставете ги во врелото млеко. Варете ги кратко, околу 30 секунди, па превртете ги на другата страна.

4. Кога ќе се зголемат, внимателно извадете ги со лажица со дупчиња и пренесете ги во длабок сад.

5. За кремот, изматете 2 жолчки со 2 лажици шеќер, потоа додајте 1 полна лажица брашно, па измешајте да стане мазна смеса без грутки, ако е многу густа, додајте малку вода. Постепено додадете ја течната смеса во садот со млеко на умерена температура, мешајќи постојано додека кремот не се згусне.

6. Прелевањето на кремот врз шненоклите е последниот чекор! Оставете го десертот да се излади, а потоа уживајте во нежната сатенска текстура и вкусот на ванила.

На здравје сладење!