Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за парени колачи чиј вкус многумина ќе ги потсети на детството – шеќерпаре.

– Медени, ронливи, во уста се топат овие шеќерпариња – порачува Бобе.

Состојки:

– 300 грама брашно
– 80 грама шеќер во прав
– 125 грама путер
– прашок за печиво
– 50 грама гриз
– 3 јајца (едното јајце се двои – белката и жолчката)
– ванилин шеќер
– кора од лимон или лажичка кардамон

Шербет:

– 600 милитри вода
– 500 грама шеќер
– три резанки лимон
– ванилин шеќер

Подготовка:

Во сад се става просеаното брашно, се додаваат шеќерот во прав, прашокот за печиво, ванилин шеќер и гризот. Се мешаат сувите состојки, па се додаваат путерот, сечен на тенки листови, двете јајца, белката и кората од лимон. Се меша со лажица за да се соединат состојките, потоа се меси да се оформи меко тесто. Ако тестото е многу лепливо, се додава малку брашно, за да може лесно да се формираат топчиња од тестото.

Се покрива тестото со еластична фолија и се остава да одмори 20 минути.

Се формираат топчиња од 30 грама од тестото, сите да бидат исти, секое топче се оформува во форма на бадем, со шилести краеви, со дланката се притиска одозгора, да се сплеска, па се редат во тава премачкана со путер. Се премачкуваат со жолчка, потоа со вилушка се прави шара, со нежно притискање во должина на секое колаче.

Се печат 15 минути во загреана рерна на 180 степени, да заруменат.

Додека се печат колачите, се подготвува шербетот. Во длабоко тенџере се ставаат водата, шеќерот, ванилата и лимонот на загреана рингла, се остава шербетот да зоврие, потоа на средна температура да врие десеттина минути.

Топлите колачи се полеваат со топол шербет, се покриваат со алуминиумска фолија и се оставаат покриени да се изладат.

Се украсуваат по желба со јаткасти плодови, кокос, сечкано суво овошје.

Уживајте!