Гастрономско уживање од вештите раце на Бобе Јанкоска: Погачици полнети со тиквички и сирење
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Препорачано
Бобе денеска споделува рецепт за вистински гурмански деликатес – погачици полнети со тиквички и сирење.
– Овие погачици се меки како памук, јас ги полнев со тиквички, сирење, кашкавал и магдонос, едните ги валкав во микс од сусам и семки, другите со чија семе. Дозата е за 24 погачици – порачува Бобе.
Состојки за тесто:
– 250 мл млеко
– 125 мл јогурт
– 125 мл масло
– лажица мед
– 10 г сув квасец
– 600 г брашно
– лажица сол
Фил и премачкување:
– 2 јајца (посебно жолчка и белка)
– 100 г путер/маргарин (растопен)
– 2 тиквички (изрендани посолени, исцедени)
– 200 г сирење/урда
– 200 г кашкавал (рендан)
– половина китка магдонос (исечкан)
– 100 г сусам/чија/микс од семки
Подготовка:
Се замесува меко тесто од сите состојки, освен јајцето, се покрива тестото и се остава да стаса 40 минути, потоа се премесува тестото и се дели на два дела, се формираат топки, се премачкуваат со масло, се покриваат со растеглива фолија и се оставаат да стасаат уште 20 минути.
Додека стасуваат се подготвува филот. Се рендаат тиквичките, се посолуваат и се ставаат во цедалка, по 10 минути се стискаат во цедалката да излезе течноста се додава сол и бибер по вкус, па се додаваат белките од јајцата и се меша сѐ заедно. Сирењето се дроби, магдоносот се сечка, а кашкавалот се ренда.
На намастена површина од едното тесто со сукало се прави кора 30 см Х 50 см, кората се мачка со растопен путер/маргарин, врз неа се става половина од сирењето/урдата, тиквичките, магдоносот и најгоре се става ренданиот кашкавал.
Кората се сече на 12 ленти од покусата страна, секоја лента се ролова, се става на работната маса, одозгора со рака се притиска ролната, да се сплеска, од страна се мачка со матените жолчки, па мачканата страна се валка во сусам/чија/микс и се става на хартија во тава за печење. Истата постапка се повторува со другото тесто и останатиот фил. Од оваа доза излегуваат две тави по 12 погачици.
Погачиците се печат 20 минути, да заруменат, во загреана рерна на 220 степени.
На здравје!
