Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – пита со праз.

– За Василица секогаш подготвувам тегната пита со праз, урда и јајца – вели Бобе.

Потребни состојки за тесто:

– 500 грама брашно
– лажиче сол
– 2 големи лажици масло
– лажиче оцет
– млака вода по потреба

Фил:

– 4 стебла праза, исечкани
– 400 грама солена урда
– 2 јајца
– масло за готвење
– сол и бибер по желба

Подготовка:

Прво се подготвува филот, па откако ќе се излади се филуваат корите. Во тава со масло на умерена температура се пржи празот, му додавам и 50 мл вода и оставам на тивко да испари водата. Потоа се зачинува со сол и бибер по вкус, па се додаваат урдата и јајцата. Се пржи уште 5 минути, да се сврзат состојките, потоа се тргнува од огнот да се излади.

Се замесува тесто од просеано брашно, сол, масло, оцет и млака вода. Тестото убаво треба да се измеси да стане мазно, па се дели на шест топчиња, од секое топче се расукува по едно крукче од 10 см, се редат во намастен сад, се премачкуваат со масло, се покриваат со растеглива фолија и се оставаат 15 минути да одмори тестото. На маса постелам чаршаф, земам едно топче тесто, со намастени раце без месење го растегам тестото и го ставам на чаршафот. Се растегаат краевите од тестото, колку што може повеќе, потоа се кинат дебелите краеви од тестото. Се попрскува кората со масло, па со фил. Потоа, со помош на чаршафот го роловам тестото до половина од едната страна, па од другата страна на кората. Така се формираат две витки кои ги виткам во круг. Во намастени тава го ставам виткалникот. Продолжувам со истата постапка со секое топче тесто.

Се пече 20 минути, во загреана рерна на 220 степени, додека да зарумени.

На здравје!