Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: мусака со модри патлиџани.

„Мирисот на печени модри патлиџани, нежен бешамел и богато месо што се крчка на тивко – тоа е вистинската дефиниција за домашна храна. За разлика од традиционалната мусака со компири, оваа варијанта со модри патлиџани е полесна, но еднакво сочно и богато јадење. А кога ќе се прелиe со кремаст бешамел, добивате слоевита хармонија што едноставно се топи во уста“, порачува Бобе.

Состојки:

• 2 -3 модри патлиџани (излупени и исечени по должина или на кругови)

• Морска сол

• Маслиново масло

• 50 грама презла

• 230 грама рендан кашкавал

За месниот сос:

• 1 лажица маслиново масло

• 2 главици кромид (ситно сечкани)

• 400 грама мелено мешано месо

• 480 грама сечкани домати (конзерва или свежи)

• 4 чешниња лук (ситно сечкани)

• ¼ лажичка мелен цимет

• ¼ лажичка пимент или лут сос

• Бел бибер, морска сол

• 2 лажици доматно пире

За бешамел сос:

• 50 грама путер

• 50 грама брашно

• 250–350 мл топло млеко (приспособете според густината)

• сол, бел бибер

• ½ лажичка мелено морско оревче

• 3 жолчки од јајце

Подготовка:

Посолете ги исечените патлиџани и оставете ги да стојат 45 минути за да ја изгубат горчината. Измијте ги, намастете со малку маслиново масло и испечете ги во грил тава неколку минути од двете страни. Оставете ги настрана.

Во тава загрејте масло, пропржете кромид, додајте го месото и запржете додека не се раздвојат парчињата. Додајте домати, лук, цимет, пимент, сол и бибер. Оставете да покрчка, па вметнете го доматното пире. Доколку е густо, додајте малку вода. Тргнете од оган.

Бешамел: Во тава растопете путер, додајте брашно и мешајте. Постепено додавајте топло млеко и варете додека не се згусне. Зачинете, тргнете од оган и додајте ги жолчките.

Подмачкајте огноотпорен сад со масло и наросете презла. Ставете слој печени патлиџани, па месо, па рендан кашкавал. Повторете го редоследот. Завршете со слој кашкавал и прелијте со бешамел сосот. Покријте со фолија и печете на 180 степени Целзиусови околу 60 минути, последните 5 минути печете без фолија.

Оставете ја мусаката да се излади 15-20 минути пред сечење.

Ова јадење може да се направи ден претходно – вкусот е уште побогат наредниот ден!

На здравје!