Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за традиционален македонски гурмански деликатес – боранија.

– Боранијата во мојот дом е присутна повремено, најчесто посна без месо, така ја сакаме најмногу. Можеби сите не ја обожаваат, но вака подготвена ќе ви се допадне. Ова е здрав и нутритивен оброк кој го заокружува целокупното здравје и благосостојба на вашиот организам – порачува Бобе.

Состојки:

– 450-500 грама боранија
– два поголеми моркови (исечкани на тенки ленти)
– две пиперки зелени (исечкани на ленти)
– 5-6 лукчиња
– 300 мл доматен сос
– половина китка магдонос (исечкан)
– 300 мл вода
– лажица зачинал, лажица црвен пипер, бибер и сол

Подготовка:

Во тенџере со загреано масло за јадење се ставаат морковите и пиперките. Се пржат 5 минути, да омекнат, потоа се додава лук, црвен пипер, зачинал и бибер по вкус, па се додава боранијата со мешање да поприми од зачините, се пржи 5 минути, па се додава вода. Се покрива со капак (полуотворен) и се остава да крчка 10 минути, да се намали течноста. Се додава сол (ако има потреба) и доматниот сок, повторно се остава да крчка за да се добие саканата густина на манџата.
Кога ќе биде готова, се додава магдоносот, се меша и се тргнува од огнот.
На здравје!