Maкедонската фудбалска репрезентација утре на Арената „Тодор Проески“ од 20:45 часот го игра натпреварот против Белгија во рамките од квалификациите за Светското првенство.

На еден ден пред натпреварот стандардната прес-конференција ја одржа селекторот на Белгија, Руди Гарсија кој истакна дека Македонија е репрезентација која несмее да се потцени.

„Сите 26 фудбалери кои се повикани се во добра форма, иако дел од нив имаат различни ситуации во клубовите. Сите се подготвени, има проблеми во јуни поради крајот на сезоната. Сепак, најважно е што сите со желба доаѓаат во Скопје за да победат. Сите кои беа повредени, во моментов се во добра форма. Секогаш е предизвик да се игра на гости, ама ние сме подготвени. Јасно ни е дека имаме ривал против кој мора да дадеме максимум“, вели Руди Гарсија.

„Временските фактори треба да се земат в предвид. За утре е предвидено да биде нешто поладно вечерта, ама освен температурата тука е различна и влажноста на воздухот. Тоа ќе биде предизвик, но ние ги направивме сите подготовки при тренажниот процес. Токму затоа дојдовме порано, да ги почувствуваме условите на теренот и да имаме појасна слика“, додава селекторот на Белгија.

Елиф Елмас кој е наш највреден репрезентативец имаше прилика да соработува со Гарсија во Наполи.

„Не е само Елмас, Македонија има и други солидни играчи како што се Барди, Алиоски… очекувам тежок натпревар. Тоа е тим кој прави притисок, знае да ги искористи грешките на противникот и мора да бидеме внимателни и да го дадеме максимумот“.

„Ја анализиравме Македонија, знаеме дека имаме работа со силен тим, за нас е специфично што ова ни е прв меч во квалификациите за разлика од Македонија која веќе собра четири бода. Ќе дадеме се од себе“.

Три дена по натпреварот со Белгија, Македонија ја очекува и гостување против Казахстан.