Екипата на Еурофарм Пелистер утревечер го започнува својот настап во новата сезона од Лигата на шампионите и тоа на домашен терен во Битола, каде што ќе ја пречека екипата на Загреб.

Новата сезона битолскиот клуб ја започнува и со нов стратег на клупата, Рубен Гарабаја ќе го предводи тимот откако пристигна на местото на Раул Алонсо.

Во пресрет на првиот меч, Гарабаја не ја криеше возбудата порачувајќи дека со нетрпение чека да  ја почувствува атмосферата во салата „Боро Чурлевски“ во натпреварите од Лигата на шампионите.

„Загреб е еден конкурентен тим, играат одлично во одбраната, посебно во средината. Треба да ја наметнеме нашата игра и да играме како во подготвителниот период. Подготвен сум за атмосферата во Битола, сите ми зборуваат за тоа откако пристигнав и сакам навивачите да уживаат во нашата игра“, изјави Гарабаја.

Средбата меѓу Пелистер и Загреб е закажана за утре со почеток во 20:45 часот и се очекува салата да биде исполнета.