Гана го прифати барањето на Вашингтон да ги прими граѓаните на западноафриканските земји депортирани од САД, објави во среда нејзиниот претседател Џон Махама.

„САД нè замолија да ги примиме државјаните на трети земји кои се депортираат. Се согласивме со нив дека државјаните на западноафриканските земји ќе ги прифатиме“, изјави Махама за медиумите.

Според него, 14 лица веќе пристигнале во Гана според оваа политика, вклучувајќи нигериски државјани, кои сега се вратиле во своите матични земји.

Регионален договор им овозможува на граѓаните на западноафриканските земји слободно да се движат, без потреба од визи за пасош, од една земја во друга.

Депортациите во трети земји – со кои луѓето што се депортираат во многу случаи немаат никаква врска – се меѓу најпроблематичните мерки на американскиот претседател Доналд Трамп за борба против нелегалната миграција. Стотици луѓе се депортирани во Панама, Ел Салвадор, Јужен Судан…

Договорот потпишан меѓу Гана и САД беше евидентиран во време кога Вашингтон ги зголеми царинските давачки за производите увезени од оваа африканска земја и објави дека се воведуваат ограничувања и за визите издадени на жителите на Гана.

Махама вчера призна дека односите меѓу Акра и Вашингтон минуваат низ „напнат“ период и истакна дека неговата влада се стреми да го зголеми извозот во Кина.

Соседна Нигерија, од своја страна, одбива да склучи таков договор со Вашингтон. Кога во јуни беше побарано да ги прими венецуелските државјани, таа реагираше преку министерот за надворешни работи Јусуф Тугар, осудувајќи го „притисокот“ врз африканските земји.

Во Гана, во последните месеци имаше протести против нигериската имигрантска заедница, која е обвинета за зголемување на криминалот и проституцијата, како и за нелојална конкуренција.

Кон крајот на јули, владите на Гана и Нигерија одржаа разговори барајќи начини за деескалација на тензиите.