Постапокалитична е сликата во Ирпин и Буча, двете населби во предградието на украинската престолнина Киев. За да стигнете до таму треба да го поминете срушениот ирпински мост. Таму се уште има уништени возила кои се заглавени во средина на тешката арматура.

Во Ирпин речиси е невозможно да најдете барем една куќа или зграда која не е изрешетана од автоматско оружје или која не е ракетирана. Дупки од проектили на земја, во објектите… Дупки од автоматско оружје на автомобилите, на ѕидовите… Или барем на она што останало од нив.

Ирпин изгледа и звучи како град на духови. Таму повеќе не живее никој освен уличните кучиња, а единствениот звук кој се слуша е тропањето на уништените лимови од силниот ветер. Помеѓу зградите можат да се видат украински уништени тенкови, а изрешетаните цивилни возила сведочат за обидите за бегство од ужасот.

До таму, се уште се пропуштаат само новинарски екипи и службени лица. А има и зошто. Кога армијата првпат влезе со својата прес-служба, сними и фотографираше тела расфрлени по улиците, дел од нив веќе во фаза на распаѓање.

Кога пристигнав во Буча, поголемиот дел од телата веќе беа изнесени, но сепак на улиците и зад рушевините во она што некогаш било нечиј дом, забележав неколку тела.

Еден од војниците ми се обрати и ми кажа дека е можно под нив да има мини. Тој додаде дека ако продолжам да одам по патот, не смеам да допирам ништо што е оставено на земја и дека мора да внимавам каде газам. Кога еден од војниците згазна на големо парче лим, неговите колеги веднаш гласно го прекорија.

Главната улица во Буча е местото каде се наоѓаат остатоци од борбените возила на руската армија. Целиот конвој долж улицата е уништен и изгорен до последното парче оружје. На почетокот и на крајот на улицата имаше куп муниција и неколку видови бомби кои украинската армија ги собрала за да направи делумно безбедна трака за поминување.

Се знае дека во тој конвој се наоѓала четата на озлогласениот чеченски воен лидер Кадиров. Замолив за коментар член на украинската армија кој ми кажа дека за нив не е важно кој се наоѓал во конвојот, единствено што за нив било важно е тоа дека конвојот бил испратен од Москва да ја нападне Украина и дека тоа е руска воена опрема. Тој додаде и дека ова е една од поголемите нивни победи, како и тоа дека ваква слика ќе видат сите што ќе помислат да ја нападнат неговата држава.

На улицата се појавија и неколкумина Чеченци кои не сакаа да разговараат со мене само затоа што сум жена, но почекаа да повикам колеги мажи за да дадат изјава за медиумите. Се работи за сепаратистичка група која се бори во Украина уште од 2014 година. Нивниот лидер пред камерите кажа дека во 2014 година дошле да војуваат во Донбас за да и помогнат на украинската армија да се справи со Русите. На констатацијата од страна на новинарите дека има две различни чеченски сепаратистички групи кои се борат, едната на страната на Русија, а другата на страната на Украина, тој одговори дека Кадиров и неговата група не се вистински Чеченци.

На крајот, она што е извесно е дека на украинските служби ќе им треба многу време за да го исчистат целиот тој хаос кој останал од борбите кои се воделе со денови во Ирпин и Буча. А кога конечно ќе го исчистат, ќе треба да се сруши се она што некогаш било куќа или зграда затоа што е крајно небезбедно и практично невозможно за поправање, па потоа да се градат нови живеалишта за оние кои го преживеаја или успеаја да се евакуираат пред овој масакр. За жал, голем дел од жителите на Буча ја немаа таа среќа да чекаат и да се надеваат на нов дом…

Погледнете ја и видео-репортажата од Ирпин и Буча: