Најголемиот зафат при реновирањето на овој стан претставуваше рушење на ѕидовите помеѓу малата дневна соба, ходникот и кујната. Во еден простор без прегради сега се обединети просторите за седење и одмор, и приготвување на храна.

Во просторот за дневен престој зачуван е паркетот со сета своја патина, и без никакви интервенции. Во продолжение поставени се нови керамички плочки со специфичен патерн и нијанси што се во склад со бојата на ѕидовите и елементите од кујната.

Покрај постоечката гарнитура за седење, додадени се нови елементи на кои се поставени телевизорот и дел од колекцијата на цртежи, графини и фотографии на корисниците.

Наместо класична трпезариска маса, изработен е еден елемент споен со плакар што двострано се користи.

Најголема трансформација доживеа бањата. Демонтирана е кадата и на истото место поставен е туш, затворен со стаклена врата и одделен од другиот дел од бањата.

Поткровјата во зградите имаат посебен шарм со високите прекршени плафони што ја следат косината на покривот.Убавиот поглед од високо и изобилството на сончева светлина придонесуваат за пријатната атмосфера во просторот. Единствено, после качувањето по скали до петтиот кат човек може да почувствува лесен умор што бргу поминува.